मुंबई, दि.14 : कोविड-19 या संसर्गजन्य साथीच्या रोगाची राज्यातील स्थिती, कोरोना विषाणूविषयीची खरी माहिती, तसेच प्रादुर्भाव रोखण्यासाठी व बाधितांवर उपचारासाठी राज्य शासनाच्या वतीने केल्या जाणाऱ्या विविध उपाययोजनांची माहिती देणाऱ्या शासनाच्या ‘महाइन्फोकोरोना‘ या संकेतस्थळाला नेटकऱ्यांचा भरघोस प्रतिसाद मिळतो आहे.
देशात व राज्यात कोरोना विषाणूचा प्रादुर्भाव वाढू नये, यासाठी केंद्राबरोबरच राज्य शासन विविध उपाय योजत आहे. त्याचबरोबर कोरोना बाधितांची योग्य ती काळजी घेऊन रुग्णांना बरे करण्यासाठी राज्याची आरोग्य यंत्रणा अविरत प्रयत्नशील असून मुख्यमंत्री उद्धव बाळासाहेब ठाकरे, आरोग्यमंत्री राजेश टोपे यांच्यासह मंत्रीमंडळातील सर्व मंत्री आपआपल्या विभागामार्फत राज्यातील जनतेची काळजी घेत आहेत. शासनाच्या वतीने करण्यात येत असलेल्या विविध उपाययोजना, लॉकडाऊनमुळे अडचणीत आलेल्या नागरिकांसाठी निवारागृहे, वेगवेगळ्या जिल्ह्यात जिल्हा प्रशासनाने केलेल्या उपाययोजना या सर्वाची एकत्रित, अधिकृत व खात्रीशीर माहिती पुरविण्यासाठी राज्य शासनाच्या माहिती व जनसंपर्क महासंचालनालयाने https://www.mahainfocorona.in/या संकेतस्थळाची निर्मिती केली आहे. हे संकेतस्थळ कार्यरत झाल्यापासून आठवडाभरात नेटकऱ्यांचा भरघोस प्रतिसाद मिळाला आहे.
या संकेतस्थळावर कोवीड 19 ची सर्वसाधारण माहिती दिली आहे. ज्यामध्ये हा रोग कसा होतो, कोरोना संसर्गापासून बचावासाठी काय काळजी घ्यावी, कोरोनाच्या प्रतिबंधासाठी कोणकोणते प्रयत्न केले जात आहेत. कोरोनाबाधितांची जिल्हानिहाय रोजची आकडेवारी इन्फोग्राफीकसह माहिती दिली आहे. त्याचबरोबर राष्ट्रीय कॉल सेंटर व राज्यस्तरीय नियंत्रण कक्षाचे क्रमांकही देण्यात आले आहेत. त्याचबरोबर जिल्हानिहाय हेल्पलाईनचे क्रमांकही या ठिकाणी देण्यात आले आहेत.
तसेच सार्वजनिक सुविधा या विभागात प्रत्येक जिल्ह्यात कोणकोणत्या सोयीसुविधा केल्या आहेत, त्याची जिल्हानिहाय सविस्तर माहिती देण्यात आली आहे.
“घडामोडी” या सदरात राज्य शासनाचे विविध विभागानी घेतलेले निर्णय, जिल्हा प्रशासनाने घेतलेल्या निर्णयांची अंमलबजावणी, मुख्यमंत्री, इतर मंत्री, विभागीय आयुक्त, जिल्हाधिकारी यांच्या पत्रकार परिषदांची व बैठकांची माहिती, राज्यात घडणाऱ्या ठळक घडामोडी आदींची माहिती देण्यात आली आहे. माध्यमांपर्यंत लवकरात लवकर माहिती मिळावी, यासाठी हे सदर वेळोवेळी अद्ययावत होणार आहे. माहिती व जनसंपर्क महासंचालनालयाच्या वतीने ट्विटर आणि फेसबुकवर देण्यात येणाऱ्या माहितीची लिंकही येथे देण्यात आली आहे. विश्लेषण सदरात राज्य शासनाच्या वैद्यकीय शिक्षण व औषधी द्रव्य विभागाच्या वतीने कोरोना प्रादुर्भावाची राज्यातील स्थिती याचे विश्लेषणात्मक माहितीचा अहवाल देण्यात आला आहे. ही माहिती येथून डाऊनलोडही करता येणार आहे.
कोरोनाविरुद्धच्या लढ्यात सहभागी होण्यासाठी मुख्यमंत्री सहायता निधी-कोवीड 19 च्या खात्याचा क्यूआर कोडही येथे देण्यात आला आहे, जेणेकरून इच्छुकांना थेट मदत देता येणे शक्य होणार आहे.
कोरोनाविरुद्धचा लढा जिंकण्यासाठी राज्य शासन सर्वतोपरी प्रयत्न करत आहे. या प्रयत्नांची अधिकृत व खात्रीशीर माहितीसाठी माहिती व जनसंपर्कच्या https://mahainfocorona.inया संकेतस्थळावर नियमित भेट देण्याचे आवाहन राज्य शासनाच्या वतीने करण्यात आले आहे.
0000
श्री. किशोर गांगुर्डे, व.स.सं.
