धक्कादायक!!! पुण्यात जवानांच्या श्रद्धाजंली कार्यक्रमात पाकिस्तानचा जयघो
जम्मू-काश्मीरच्या पुलवामा जिल्ह्यात गुरुवारी दहशतवादी हल्ल्यात भारताचे ४० जवान शहीद झाले. या दहशतवादी हल्ल्यानंतर देशभरात संतापाची लाट उसळली आहे. शहीद जवानांना देशभरात श्रद्धांजली वाहिली जात आहे. पुण्यात आयोजित केलेल्या श्रद्धांजली सभेत एका माथेफिरू तरुणाने पाकिस्तानच्या समर्थनार्थ घोषणाबाजी केल्याचा प्रकार उघडकीस आला आहे. कुमार उपेंद्र सिंह असे या तरुणाचे नाव असून तो ज्युनिअर तिकिट तपासणीस आहे. पोलिसांनी त्याला अटक केली आहे.
पुलवामामध्ये शहीद जवानांना श्रद्धांजली वाहण्यासाठी पुण्यात एका श्रद्धांजली सभेचे आयोजन करण्यात आले होते. या ठिकाणी जमलेले सर्व लोक ‘भारत माता की जय’, ‘पाकिस्तान मुर्दाबाद’, अशा घोषणा देत होते. परंतु, कुमार उपेंद्र सिंहने ‘पाकिस्तान जिंदाबाद’ अशी घोषणाबाजी देण्यास सुरुवात केली. या घोषणाबाजीमुळे उपस्थित लोक चांगलेच संतापले. पोलिसांना यासंबंधी माहिती दिल्यानंतर पोलिसांनी आरोपी कुमार उपेंद्र सिंहविरुद्ध कलम १५३ (ब) अंतर्गत गुन्हा दाखल केला व त्याला अटक केली आहे. रेल्वे प्रशासनाला याची माहिती होताच रेल्वेने गंभीर दखल घेत उपेंद्र बहादूर सिंहला तडकाफडकी निलंबित केले आहे. दरम्यान, पुलवामा हल्ल्यानंतर जम्मू काश्मीर पोलिसांनी दक्षिण काश्मीरमधून ७ संशयितांना ताब्यात घेतले आहे.
